كانت خضرا
--- --- ----
يا أرض ف يوم كانت خضرا
و صابها ممات
ضمير من نومه بقى ذكرى
خربها ومات.
قلوب عابت...عقول غابت
وشوش دابت..وصابها سُبات
وليل سارح ..من امبارح
وصوت جارح ...كتمنا سُكات
نهار مخنوق ...و يوم مزنوق
بريء مشنوق ...ومجرم فات
وراية فوق سما نجومها
لففها ضبابها و غيومها
وبات الحق من غدر الزمن
في شتات
ده شيء مقسوم وشيئ محتوم
بقى معلوم وله علامات
فناس السحت في كروشهم
وناس ملزوقة ف عروشهم
وناس مش لاقية بقروشهم
لقم وفتات
جنين ساكن رحم أمه
وطلق الوضع مش هامه
وحضن العلّة بيضمه
ورافض يتولد بعاهات
وحالة غريبة عايشنها
وصورة ذل بتشينها
شعور بمهانة قفشينها
بدون علاجات ..
مادام الحكم مش صادر
وصوت الحق مش قادر
فرب العرش فوق قادر
على ذل العزيز بثبات
أيمن خليل
ليست هناك تعليقات:
إرسال تعليق